വെള്ളിക്കുളങ്ങരയ്ക്കടുത്ത് കുറ്റിച്ചിറ വൈലാത്ര കോളനിയിലെ വലിയപറമ്പില്‍ ശിവന്‍ എന്നു വിളിക്കുന്ന ശിവദാസന്‍ (36) ആണ് അറസ്റ്റിലായത്. ജൂലായ് 30ന് രാത്രിയാണ് ടൗണിലെ കൊടകര കേബിള്‍ വിഷന്‍ ഓഫീസിലെ ബൈക്ക് മോഷണം പോയത്. കൊടകര പോലീസില്‍ പരാതി നല്‍കിയിരുന്നെങ്കിലും ബൈക്ക് കണ്ടെത്താനായില്ല. പന്ത്രണ്ട് ദിവസം കഴിഞ്ഞ് കസ്റ്റഡിയിലെടുത്ത ബൈക്കിന്റെ രേഖകള്‍ ഹാജരാക്കാത്തതിനാല്‍ നിയമനടപടി സ്വീകരിക്കുമെന്ന തൃശ്ശൂര്‍ ട്രാഫിക് പോലീസിന്റെ നോട്ടീസാണ് ഉടമയ്ക്ക് ലഭിച്ചത്. തുടര്‍ന്ന് അന്വേഷിച്ചപ്പോഴാണ് മോഷ്ടാവ് ബൈക്കുമായി ട്രാഫിക് പോലീസിന്റെ പിടിയിലായ വിവരമറിയുന്നത്. കഴിഞ്ഞ ദിവസം കുറ്റിച്ചിറയില്‍ മദ്യപിച്ച് ബഹളമുണ്ടാക്കിയ പ്രതിയെക്കുറിച്ച് രഹസ്യവിവരത്തെ തുടര്‍ന്നാണ് കൊടകര പോലീസ് സംഘം എത്തി അറസ്റ്റ് ചെയ്തത്.
